ब्रिटिश–नेपाली लेखक, निर्देशक तथा निर्माता प्रदीप शाही सन् २०२५ मा हुने कान प्रोड्यूसर्स नेटवर्कका लागि चयन भएका छन्।
यो प्रतिष्ठित प्लेटफर्म विश्वप्रसिद्ध कान्स फिल्म फेस्टिवल अन्तर्गतको Marché du Film मा समावेश गरिन्छ। यस चयनसँगै शाही विश्वभरका प्रभावशाली निर्माता र फिल्म क्रिएटरहरूको सूचीमा स्थान बनाउन सफल भएका छन्।
शाहीले यस वर्ष मे महिनामा आयोजना हुने कान्स फिल्म मार्केटमा आफ्नो नयाँ साइ-फाइ फिल्म ‘एक्लो’ प्रस्तुत गर्नेछन्। ‘एक्लो’ एक जम्बी थ्रिलर फिल्म हो, जसको कथा हिमालयको आध्यात्मिकता र मिथकीय पृष्ठभूमिमा आधारित छ। हाल पोस्ट-प्रोडक्सन चरणमा रहेको यो फिल्मले पूर्वी दर्शन र पश्चिमी सिनेम्याटिक थ्रिलर शैलीको संयोजनमार्फत यस्तो भविष्य देखाउँछ, जहाँ मानव जाति विनाशको संघारमा उभिएको छ।
‘एक्लो’ योजनाबद्ध त्रयी (ट्रायोलोजी) को पहिलो अध्याय हो, जसले अस्तित्वको संघर्ष, पौराणिकता, र ती अदृश्य शक्तिहरूको कथा पेश गर्छ, जसले मानव नियतिको मार्ग निर्देशन गर्छन्।
“कान्स प्रोड्यूसर्स नेटवर्कमा भाग लिन पाउनु मेरो लागि ठूलो सम्मान हो,” शाही भन्छन्, “यो केवल एउटा फिल्म प्रस्तुत गर्ने कुरा होइन, यो नेपाललाई विश्वसामु चिनाउने प्रयास पनि हो।”
‘एक्लो’ मार्फत उनले नेपालमै बसेर पनि विश्वस्तरको फिल्म निर्माण सम्भव छ भन्ने कुरा देखाउन खोजेका छन्।
शाही गोर्खा सैनिकमा आधारित पहिलो नेपाली फिल्म “1915: Legend of the Gurkha” र प्राचीन हिमालयन परम्परा ‘स्काइ ब्युरियल’ मा आधारित “The Last Ritual” का निर्देशकका रूपमा परिचित छन्। यी दुवै फिल्म Amazon Prime मा हेर्न सकिन्छ। उनका कृतिहरूले पूर्वी संस्कृतिको मौलिकता र पश्चिमी दर्शकलाई आकर्षित गर्ने विषयवस्तुको संयोजनमार्फत पहिचान, सांस्कृतिक सम्पदा र मानव संवेदनामा आधारित नयाँ दृष्टिकोण प्रस्तुत गर्छन्।
निर्देशक शाहीका अनुसार, नेपाली फिल्मलाई अन्तर्राष्ट्रिय बजारमा पुर्याउने उद्देश्यका साथ ‘एक्लो’ निर्माण गरिएको हो। शाहीले बेलायतमा फिल्म मेकिङ पढेका हुन्। त्यहाँ केही सर्ट फिल्म र सिरिजमा काम गरेपछि उनले नेपाली फिल्म निर्देशनमा होमिएका थिए।
‘एक्लो’ मार्फत शाहीले नेपाली फिल्मको दायरा अझ फराकिलो बनाउँदैछन्। पौराणिकता, अस्तित्ववादी भय र गहिरो दृश्य-कथावाचनलाई मिसाएर यस्तो सिनेम्याटिक अनुभव दिन खोजेका छन्, जसले पूर्व र पश्चिमलाई जोड्ने काम गर्छ।
फिल्म ‘एक्लो’ मा प्रदीप खड्का, बेनिसा हमाल, विजय लामा, सुनील थापा, दिया पुन, दिनेश डीसी, सुरज सिंह ठकुरी, एवन राज उप्रेती, कविता नेपाली, त्रुचु राई, कृष्णभक्त महर्जन, विकास अधिकारी, दिग्गज खत्री, विनोद सुवेदी ‘क्षितिज’, श्रीशेष श्रेष्ठ, बाल कलाकार जेभिन श्रेष्ठ र स्योन सविक सिंहसँगै बेलायती अभिनेता जेमी बेकन को अभिनय रहेको छ।
शाइ प्रोडक्सन नेपालको ब्यानरमा निर्माण भएको यस फिल्ममा ह्याम्साएर एकाउन्टेन को सहकार्य रहेको छ।
फिल्म ‘एक्लो’ का निर्माता राजु कुमार गुरुङ, हरि श्रेष्ठ, विष्णु तामाङ, उत्सव विष्ट, संगिता वादी श्रेष्ठ, भाइराजा थापा, नवीन सिवा, बागवीर पुन हुन् भने कार्यकारी निर्माता विनोद सुवेदी ‘क्षितिज’ रहेका छन्। बाबु श्रेष्ठले छायांकन गरेको फिल्ममा राजु तामाङ को द्वन्द्व निर्देशन, राजु पेन्टर को सेट डिजाइन, र सन्तोष लामा को कला निर्देशन रहेको छ।
