स्वभावैले मानिस सहज अवस्थामा रहन चाहन्छ । जबसम्म परिस्थिति सहज रहन्छ त्यसलाई जारी राख्नु उसको मनोविज्ञान हो । जे चलिरहेछ, त्यो नै चलिरहोस्, मान्छेको चाहाना त्यही हो । तर अभिनयमा त्यसमा पनि नेपाली सिनेमा क्षेत्रमा चाँहि कलाकार स्वयं आफ्ना भूमिकामा निर्णायक हुन विरलै पाउँछ ।
कुनै एकप्रकारको भूमिकामा उसलाई रुचाइयो भने त्यो कलाकार हरेक नयाँ फिल्ममा उहीप्रकारको भूमिकामा देखिने, अझ भनौं देखाइरहने गरिन्छ ।
अक्सर यसो हुने गरेको भएतापनि कहिले भने मेकर कोही कलाकारलाई सहज घेराबाट बाहिर निकाल्ने दुस्सहासमा लाग्छन् । उसले त्यो विशेष कलाकारमा एउटा फरक चरित्र बोकेको पात्र देख्छ ।
चैत २९ गते यस्तै घटना नेपाली पर्दामा परिक्षित हुनेवाला छ । त्यो घटनाको पात्र हुन अभिनेता विपीन कार्की ।
अर्थात अभिनेता विपीन कार्की आफ्नो कम्फर्ट जोन छोडेर पहिलोपटक एक्सन फिल्ममा देखिँदैछन्। ‘कर्मा’मा उनी पहिलोपटक एक्सन भूमिकामा देखिँदैछन्।
सोसल ड्रामामा काम गर्दै आएका विपीन पहिलोपटक एक्सनमा काम गर्न कसरी तयार भए? निर्देशक सौरभ चौधरीको पहिलो अफरमै उनले एक्सन भूमिकामा काम गर्न विपीन तयार भएका थिए।
नयाँ नयाँ स्टोरी र जनरामा काम गर्न रुचाउने विपीनले एक्सनमा काम गर्न सहजै तयार भएका थिए। ‘कर्मा’का लागि विपीनले तौल घटाउने, जिम जानेसम्मको काम गरेका थिए।
निर्देशक सौरभ चौधरी नेपाली एक्सन फिल्मलाई लिएर फरक धारणा राख्छन्। उनी एक्सन फिल्मको भाष्य नै बदल्न चाहन्छन्।
नेपाली फिल्ममा मुस्किलले तीनदेखि चारवटा एक्सन सिक्वेन्स हुने र त्यसैलाई फिल्म भनेर भन्ने गरिएको उनी बताउँछन्।
“कुनै फिल्ममा एक्सन सिक्वेन्स छ। तर, समग्रमा त्यो फिल्मलाई इमोसनले ड्राइभ गरेको छ भने त्यो फिल्मलाई एक्सन भन्ने कि सोसल ड्रामा?” उनको प्रश्न छ। एक्सन फिल्म भन्ने हो भने त्यसमा एक्सनको सिक्वेन्स पनि त्यहीअनुसार हुनुपर्नेमा उनको जोड छ।
साढे दुई घण्टाको फिल्ममा २० मिनेट फाइटको सिन भए त्यसलाई एक्सन फिल्म भन्ने कि नभन्ने बहसको विषय भएको उनको तर्क छ।
चैत २९ गते रिलिज हुने फिल्मको अन्तर्राष्ट्रिय प्रदर्शन अधिकार सेभेन सिज सिनेमाले लिएको छ।
आर्टिस्टिक इनटरटेनमेन्टको प्रस्तुति रहेको फिल्ममा विपीन कार्की, उपासना सिंह ठकुरी, मुकुन भुसाल, सरिता गिरी, दिब्यदेब, बेन बस्नेत, सुज्यान सिलवाल, अनिल बुढाथोकी, निर्मल शर्मालागायतको अभिनय रहेको छ।
‘कर्मा’ ड्रामा, सस्पेन्स र एक्सन जनरामा निर्माण भएको छ। वसन्त लम्सालको लगानी रहेको ‘कर्मा’ मा सञ्जय लामाको छायांकन, उत्तम न्यौपानेको ब्याकग्राउन्ड स्कोर र साउन्ड डिजाइन छ।
फिल्ममा भाष्कर स्वाँरको संगीत निर्देशन, कविराज गहतराजको कोरियोग्राफी, श्री श्रेष्ठको द्वन्द्व निर्देशन र निमेष श्रेष्ठको सम्पादन छ।
