‘कर्मा’ ट्रेलर : ड्रामा, सस्पेन्स र एक्सनको मिश्रण ‘कर्मा’ ट्रेलर :  ड्रामा, सस्पेन्स र एक्सनको मिश्रण

‘कर्मा’को ट्रेलर सार्वजनिक भएको छ ।

काठमाडौंमा बिहीबार एक कार्यक्रम आयोजना गरेर ‘कर्मा’को ट्रेलर सार्वजनिक गरिएको हो ।

सार्वजनिक ट्रेलरले फिल्म ड्रामा र एक्सनको सेरोफेरोमा प्रस्तुत हुने देखाएको छ ।

ट्रेलरमा फिल्मका मुख्य कलाकार अटाएका छन् । विपीन कार्की, उपासना सिंह ठकुरी, मुकुन भुसाल, सरिता गिरीलगायत कलाकार अटाएको ट्रेलरमा एक्सनलाई प्रधानता दिइएको छ ।

सार्वजनिक ट्रेलरमा भ्रष्ट समाजले एक निर्दोष र सिधा युवालाई कुन हदसम्म पुर्याउँछ भन्ने कथा यो फिल्मले बोल्ने देखाएको छ । आफ्नो उद्देश्य प्राप्तिका लागि हिँडेको युवा कसरी परिस्थितिले गुण्डागर्दी र प्रहरीको कस्टडीसम्म पुर्याउँछ भन्ने ट्रेलरमा समावेश छ ।

विपीनलाई एक्सन अवतारमा प्रस्तुत गरेका निर्देशक सौरभ चौधरीले एक्सनको जगमा बसेर पैसा र पावरका लागि मरिहत्ते गर्ने समाजको कथा भन्न खोजेका छन् ।

‘कर्मा’मा विपीन, उपासना, मुकुन र सरितासँगै दिब्यदेब, बेन बस्नेत, सुज्यान सिलवाल, अनिल बुढाथोकी, निर्मल शर्मा आदि कलाकारको अभिनय रहेको छ ।

नयाँ वर्ष २०८२ को छेको पारेर ‘कर्मा’ आगामी चैत २९ गते रिलिज हुँदैछ । नेपाल र विदेशमा यो फिल्म एकसाथ प्रदर्शन हुनेछ ।

एक्सन जनरामा निर्माण भएको ‘कर्मा’ ड्रामा, सस्पेन्स र एक्सनको मिश्रण हो । फिल्मको कथा निर्देशक चौधरी स्वयंले लेखेका हुन् ।

‘कर्मा’ले अन्तर्राष्ट्रिय प्रदर्शन अधिकार सेभेन सिज सिनेमाले लिएको छ ।

यो फिल्ममा भाष्कर स्वाँरको संगीत निर्देशन, कविराज गहतराजको कोरियोग्राफी, श्री श्रेष्ठको द्वन्द्व निर्देशन र निमेष श्रेष्ठको सम्पादन छ ।

तारानाथ न्यौपाने मुख्य सहायक निर्देशक रहेको फिल्ममा समीर मियाको भिएफएक्स, उत्तम न्यौपानेको ब्याकग्राउन्ड स्कोर, शाहिल खानको टिजर–ट्रेलर, विजय बश्यालको पब्लिसिटी डिजाइन र राजेन्द्र मोक्तान कलरिस्ट रहेका छन् ।

आर्टिस्टिक इन्टरटेनमेन्टको प्रस्तुति रहने ‘कर्मा’मा वसन्त लम्सालको लगानी रहेको छ ।

निर्देशक चौधरीको ‘अगस्त्यः च्याप्टर १’ले दर्शक र समीक्षकबाट राम्रो प्रतिक्रिया पाएको थियो ।

केहि भन्नु छ?

Copyright © Ramailo6 - All right reserved. Designed by Zookti