‘के घर के डेरा : घर नं २’ का ३ पोस्टर सार्वजनिक, रिलिज मिति पनि फेरियो ‘के घर के डेरा : घर नं २’ का ३ पोस्टर सार्वजनिक, रिलिज मिति पनि फेरियो

दीपेन्द्र के खनाल निर्देशित ‘के घर के डेरा : घर नं २’ ले एकसाथ ३ पोस्टर रिलिज गरेको छ। ३ पोस्टर रिलिज गर्दै सिनेमाले रिलिज मिति समेत परिवर्तन गरेको नयाँ जानकारी दिएको छ।
यसअघि जेठ ९ गते रिलिज हुने भनिएको सिनेमा अब एक हप्ता पहिले अर्थात् जेठ २ मा रिलिज हुने भएको छ।

आज सार्वजनिक गरिएका तीन पोस्टरमध्ये एकमा निश्चल बस्नेतलाई सोलो रूपमा प्रस्तुत गरिएको छ, जहाँ निश्चललाई कतै पुग्न हतार भएझैं कुदिरहेको अवस्थामा देख्न सकिन्छ। यस पोस्टरमा उनको अनुहारले उनी तनावपूर्ण अवस्थामा रहेको देखाउँछ।

यसैगरी, दोस्रो पोस्टरमा अर्का अभिनेता खगेन्द्र लामिछाने तथा अभिनेत्री उपासना सिंह ठकुरीलाई रोमान्टिक शैलीमा प्रस्तुत गरिएको छ। पोस्टरमा झोला भिरेकी तथा हातमा केही सामान बोकेर हिँडिरहेकी उपासनालाई अभिनेता खगेन्द्रले साइकल डोरेर मुस्कुराउँदै पछ्याइरहेका छन्।

तेश्रो पोस्टरमा सिनेमाका अधिकांश मुख्य पात्रहरूलाई प्रस्तुत गरिएको छ। सार्वजनिक तीन पोस्टरमध्ये सबैभन्दा शक्तिशाली यो पोस्टरले सिनेमाको नाम अनुसारको बिम्बमा आफूलाई प्रस्तुत गरेको छ। यस पोस्टरमा पात्रहरूलाई तीन तले घरको तल्ला कोठाका झ्यालमा देखाइएको छ, जसले डेरा जीवनमा उनीहरूको मनोदशा प्रकट गरेको छ।

जहाँ एकातर्फका कलाकार कोही गम्भीर भावमा छन् भने केही चिन्तित मुद्रामा देखिन्छन्, अर्को तर्फको भागमा खुशी मुद्रामा सिनेमाका पात्रहरूलाई देख्न सकिन्छ। यस पोस्टरमा अभिनेता आर्यन सिग्देल, खगेन्द्र लामिछाने र अभिनेत्री केकी अधिकारीलाई गम्भीर, चिन्ताग्रस्त र गम्भीर भावमा देख्न सकिन्छ भने, अर्को तर्फ निश्चललाई खुशी अवस्थामा, अभिनेता प्रकाश घिमिरेलाई उपासनासँग खुशी मूडमा र श्रृजना नापितलाई खुशी भइरहेको देख्न सकिन्छ।

सिनेमाको कथा बुद्धि सागरले लेखेका छन्, जो ‘कर्नाली ब्लुज’, ‘एक्लो’, ‘फिरफिरे’ जस्ता उपन्यासका लेखक हुन्। यो उनी लिखित पहिलो सिनेमाको रिलिज हुनेछ।

यसैगरी, कृष्णबहादुर थापाको सिनेमामा छायांकन रहेको यस सिनेमा एप्पल इन्टरटेन्मेन्ट, ए प्लस इन्टरटेन्मेन्ट र नटराज क्रियशनको प्रस्तुति हो।

नकिमउद्दिन, शरद श्रेष्ठ र किरण महर्जन निर्मित यो सिनेमामा युवराज कार्की कार्यकारी निर्माताका रूपमा रहेका छन्।

सिनेमामा आर्यन सिग्देल, खगेन्द्र लामिछाने, निश्चल बस्नेत, केकी अधिकारी, उपासना सिंह ठकुरी, प्रकाश घिमिरे, श्रृजना नापित, संजोग रसाइली, रुविना घिमिरेलगायतका कलाकारहरूको मुख्य भूमिका रहेको छ।

केहि भन्नु छ?

Copyright © Ramailo6 - All right reserved. Designed by Zookti