भोलिबाट प्रकाश सपुतको निर्देशकीय डेब्यू फिल्म वसन्त रिलिज हुँदैछ। निर्देशकसँगै उनी यो फिल्मका लेखक, संगीतकार र शीर्षक कलाकारसमेत हुन् । धेरैवटा जिम्मेवारीको सन्तुलन मिलाएर उनी यो फिल्म दर्शकलाई पस्कदैछन् । सालको झण्डै अन्तिम तिर रिलिज हुन लागेको यो फिल्मलाई लिएर वितरक तथा प्रदर्शकहरू आशावादी देखिएका छन्, जसका कारण फिल्मले नेपाली बक्स अफिसमा पर्याप्त शो पाएको छ।
नेपाली सिनेक्षेत्रमा यस फिल्मप्रति आशा राख्न सकिने विभिन्न कारणहरू छन्। तीमध्ये हामीले देखेका ६ प्रमुख कारण यस्ता छन्:
१. प्रकाश सपुतको नाम र ब्रान्ड
प्रकाश सपुत नेपाली संगीत क्षेत्रमा हाल सर्वाधिक लोकप्रिय नाममध्ये एक हुन्। उनका गीतहरू लगातार हिट भइरहेका छन्, र एक अर्थमा उनी ‘हिट मेसिन’ नै हुन्। संगीतमा सफल भएकाले उनी नेपाली दर्शक-श्रोतामाझ अत्यन्त चर्चित छन्। यसैले उनको निर्देशकीय डेब्यू फिल्मप्रति दर्शकको विशेष चासो हुनु स्वाभाविक हो।
हालसम्म उनका दुई फिल्म— परदेशी-२ र पूर्णबहादुरको सारंगी— रिलिज भइसकेका छन्, र ती दुवैले राम्रो व्यापार गरेका छन्। यी सफलताले वसन्त को दर्शकसंख्या बढाउन मद्दत गर्ने निश्चित छ।
२. लोकप्रिय संगीत
संगीत त प्रकाश सपुतको पहिचान नै हो। उनका हरेक गीतले चर्चा पाउने गरेका छन्। प्रकाश सपुतको गीत रिलिज भएपछि श्रोताको नजरमा पर्नु स्वाभाविक भइसकेको छ। यस फिल्मका गीतहरूले पनि राम्रो प्रभाव छोडेका छन्।
साँझ पर्यो झमक्क र बिना स्वादै जस्ता गीतहरू ट्रेन्डिङमा मात्र परेनन्, दर्शकबाट सकारात्मक प्रतिक्रिया समेत पाए। राम्रो संगीत भएको फिल्मले प्रायः राम्रो व्यापार गर्ने गरेको इतिहासलाई हेर्दा, वसन्त ले पनि यसको फाइदा उठाउने देखिन्छ।
३. प्रकाशको कथ्यशैली
प्रकाश सपुत आफ्ना गीतका भिडियोहरूलाई उत्कृष्ट कथ्यशैलीमा प्रस्तुत गर्न सिपालु छन्। उनका गीतका भिडियोहरू कथात्मक भएकाले श्रोताले तिनीहरूलाई फिल्मसरह अनुभव गर्छन्। यसले उनलाई एक कुशल कथाकारको रूपमा स्थापित गरिसकेको छ।
गीतहरूमा जस्तै, उनले वसन्त मा पनि प्रभावशाली कथा प्रस्तुत गर्ने अपेक्षा गर्न सकिन्छ। कथ्यशैली नै दर्शक तान्ने प्रमुख तत्व हुने भएकाले यस कारणले पनि वसन्त सफल हुने सम्भावना देखिन्छ।
४. कलाकारहरूको सशक्त टोली
फिल्मको अर्को बलियो पक्ष यसको कलाकारहरू हुन्। प्रकाश सपुत आफैं प्रमुख भूमिकामा छन् भने, पछिल्लो समय उत्कृष्ट अभिनय गर्ने अभिनेत्रीका रूपमा परिचित स्वस्तिमा खड्का यो फिल्मको मुख्य आकर्षण हुन्।
फिल्मका प्रचार सामग्रीमा ‘शान्ति’ पात्रको रूपमा उनी निकै प्रभावशाली देखिएकी छन्। साथै, खड्क बहादुर पुन, प्रभात पल लगायतका कलाकारहरूको अभिनय पनि फिल्मको लागि फाइदाजनक हुने देखिन्छ।
५. ट्रेलरले जगाएको उत्सुकता
फिल्मको ट्रेलर सार्वजनिक हुनु अघि वसन्त को बारेमा दर्शकहरूमा केही शंका थियो— प्रकाश सपुतले निर्देशन गरेको फिल्म कस्तो होला भन्ने। तर, ट्रेलर रिलिज भइसकेपछि ती आशंका मेटिएका छन्।
ट्रेलर प्रभावशाली छ, र यसले दर्शकलाई फिल्मप्रति आकर्षित गर्न सफल देखिन्छ। ट्रेलरमा प्रस्तुत दृश्यहरू, कथावस्तु र संवादहरूले फिल्मप्रति राम्रो ‘हाइप’ बनाएको छ।
६. पारिवारिक र सामाजिक कथावस्तु
वसन्त ले सामाजिक विषयवस्तु उठान गरेको छ, जुन नेपाली दर्शकहरूलाई बढी मन पर्ने खालको हो। फिल्मले अन्तरजातीय प्रेम, त्यसले पार्ने सामाजिक र पारिवारिक प्रभावलाई केन्द्रमा राखेको छ।
मनोरञ्जनसँगै सन्देश दिने फिल्म भएका कारण वसन्त ले मास (सामान्य दर्शक) र क्लास (गम्भीर दर्शक) दुवैलाई आकर्षित गर्नेछ। प्रकाश सपुत बच्चादेखि वृद्धसम्म लोकप्रिय छन्, जसले फिल्मलाई पारिवारिक दर्शकसमेत तान्न मद्दत गर्नेछ।
यसका साथै, फिल्मले युनिभर्सल सर्टिफिकेट पाएको छ, जसका कारण कुनै पनि उमेर समूहका दर्शकले हेर्न सक्छन्।
यी सबै कारणले गर्दा वसन्त ले राम्रो व्यापार गर्ने सम्भावना छ। प्रकाश सपुतको ब्रान्ड, उत्कृष्ट संगीत, कथ्यशैली, कलाकारहरूको सशक्त टोली, ट्रेलरले जगाएको उत्सुकता, र सामाजिक कथावस्तुले गर्दा यो फिल्मले नेपाली बक्स अफिसमा राम्रो उपस्थिति जनाउने अपेक्षा गर्न सकिन्छ।
