नयाँ वर्ष २०८२ सालको पूर्वसन्ध्यामा भक्तपुरको गठ्ठाघरमा रहेको जर्मन होम्सले ‘न्यु इयर इभ’ कार्यक्रम गर्ने भएको छ। वरिष्ठ लोकप्रिय गायक राम कृष्ण ढकाल एण्ड ब्याण्डको विशेष प्रस्तुति रहने उक्त कार्यक्रमलाई ‘न्यु इयर इभ एट जर्मन होम्स विथ राम कृष्ण ढकाल’ नाम दिइएको छ। कार्यक्रममा गायक ढकालका अलावा अन्य राष्ट्रिय कलाकारहरूको पनि प्रस्तुति रहनेछ।
चैत ३१ गते बेलुका ६ बजेबाट सुरु हुने उक्त कार्यक्रम राति १२ बजेसम्म चल्नेछ। कार्यक्रमलाई नेपालकै चर्चित उद्घोषिका/नायिका रीमा विश्वकर्माले सञ्चालन गर्नेछिन्। ‘न्यु इयर इभ एट जर्मन होम्स’ मा सांगीतिक कार्यक्रमसँगै कमेडी, साल्सा नृत्य र डी.जे सेसन पनि रहनेछ।
न्यु जर्मन आर्किटेक्चरमा बनेको भव्य हलको उद्घाटन समेत रहेको उक्त कार्यक्रममा करिब १५ सयदेखि २ हजार दर्शकलाई सहभागिता गराउने लक्ष्य राखिएको छ। ‘न्यु इयर इभ एट जर्मन होम्स’ मा सहभागिता जनाउन यही चैत २२ गतेदेखि खल्ती एप मार्फत टिकट बुकिङ गर्न सकिनेछ भने डोर सेलको पनि व्यवस्था गरिएको आयोजकले जनाएको छ। कार्यक्रममा सहभागी हुनेमध्येबाट एक जनाले थाइल्यान्ड ट्रिपको पुरस्कार प्राप्त गर्न सक्नेछन् भने अन्य विशेष उपहारहरू पनि रहेका छन्।
जर्मन होम्समा आयोजना हुने यो विशेष कार्यक्रमलाई सफल बनाउन सम्पूर्ण तयारीहरू तीव्र रूपमा अघि बढिरहेको आयोजकले जनाएको छ। २०८१ साललाई धन्यवाद दिँदै नयाँ ऊर्जाका साथ २०८२ साललाई स्वागत गर्न भव्य कार्यक्रमको आयोजना गरिएको जर्मन होम्स होटल & इभेन्ट भेन्युका सञ्चालक एवम् कार्यकारी निर्देशक राजन कार्कीले जानकारी दिनुभएको छ। नयाँ वर्षको पूर्वसन्ध्यामा भव्य सांगीतिक वातावरणको आनन्द लिन इच्छुक सबैलाई कार्यक्रम स्थलमा उपस्थित हुन आयोजक टिमले आग्रह गरेको छ।
नयाँ होटल रुम र १५०० जनाको क्षमता भएको बलरुम साथै इनडोर र आउटडोर सुविधा दिइरहेको जर्मन होम्स हस्पिटालिटी (होटल एण्ड इभेन्ट भेन्यु) विगत ४ वर्षदेखि गठ्ठाघरमा रही उच्च गुणस्तरको सेवा प्रदान गर्दै आएको एक प्रतिष्ठित गन्तव्य हो।
