अमित अग्रहरिको निर्माण र विक्की महर्जनको लेखन तथा निर्देशनमा तयार भएको फिल्म ‘आउटलः दफा २१९’ अब हिन्दी भाषामा पनि रिलिज हुने भएको छ।
फिल्मका निर्माता अग्रहरिले फिल्म हिन्दी भाषामा डब गरिएको र चाँडै रिलिज हुने बताए। उनले फिल्म हलमा रिलिज हुने कि ओटीटी प्लेटफर्ममा रिलिज हुने भन्ने विषयमा कुराकानी भइरहेको पनि जानकारी दिए।
फिल्मको हिन्दी भर्सनमा ‘केजीएफ’ जस्तो चर्चित दक्षिण भारतीय फिल्ममा आवाज दिने कलाकारहरूले स्वर भरेका छन्। फिल्मको हिन्दी ट्रेलरमा दर्शकबाट उत्कृष्ट प्रतिक्रिया आइरहेको छ।
फिल्ममा सुशील श्रेष्ठ, शिक्षा संग्रौला, नरेश पौडेल, सुमन भण्डारी लगायतका कलाकारहरूको अभिनय छ। यो फिल्मले नेपाली दर्शकहरू माझ पनि राम्रो छाप छाडेको थियो। अझै पनि हलमा चलिरहेको यो फिल्मको एक्सन पाटोलाई दर्शकहरूले उत्कृष्ट प्रतिक्रिया दिएका थिए।
नेपालमा राम्रो प्रतिक्रिया पाएपछि विदेशी बजारमा पनि यो फिल्मको माग राम्रो देखिएको छ। फिल्म यूरोप, बेलायत, अष्ट्रेलिया, अमेरिका, जापान, कतार, दुबई लगायतका देशहरूमा रिलिज हुँदैछ।
साहिल खानको सम्पादन रहेको यो फिल्ममा चुल्ठे काजीको एक्सन निर्देशन, नविन गुरुङको डीओपी छ।
