चैत २९ गते रिलिज हुने मल्टिस्टारर फिल्म ‘पिताम्बर’ की निर्देशक कृषा चौलागाईंले आफूले दर्शकहरू समक्ष आत्मसमर्पण गरिसकेको बताएकी छन्।
मंगलबार फिल्मको ट्रेलर समारोहमा बोल्दै उनले यस्तो बताएकी हुन्।
उनले फिल्म तयार भइसकेको र सोको मूल्यांकनकर्ता दर्शक भएकाले आफूले आत्मसमर्पण गरेको बताएकी हुन्।
“हामीले जतिसम्म मेहेनत गर्न सक्थ्यौं, त्यो गरिसक्यौं। जतिसम्म मेहेनत गर्न बाँकी छ, त्यो गरिरहेका छौं। अब जे बोल्छ चलचित्रले बोल्छ। हामीले आत्मसमर्पण गरिसक्यौं दर्शकसामु,” उनले भनिन्, “अब २९ गते यसको रिजल्ट आउँछ। तपाईंहरूलाई के कस्तो लाग्यो, प्रतिक्रिया दिनुहोस्। किनभने सिनेमा जति नै करोड खर्च गरेर बनाए पनि त्यो दर्शकसमक्ष पुगेन भने दर्शकहरूले थाहा पाउनुहुन्न। त्यसकारण हाम्रो दायित्व बनछ एकअर्कालाई सहयोग गर्नु।”
यसैगरी उनले मल्टिस्टारर फिल्ममा सबैभन्दा व्यस्त कलाकारहरूलाई एकै ठाउँमा ल्याएर काम गराउने काम कठिन हुने कुरा चेतावनी दिइएको थियो, तर सो चुनौतीलाई पार गर्न सकेको खुशी व्यक्त गर्दै सिनेमा निर्माणका क्रममा सबै कलाकारले परिवारका सदस्यसरह सहयोग गरेको बताइन्।
“सुरूमा धेरैले मलाई यो सिनेमा गाह्रो हुने वाला छ, किनभने यत्रो जम्बो टिम एकै ठाउँमा सम्भावना नै छैन भन्नुभएको थियो। तर सबैले एउटै परिवारको सदस्यजस्तो भएर सहयोग गर्नुभयो,” उनले भनिन्।
यो चुनौतीलाई सामना गर्न सिनेमाका सहनिर्माता एवं सिनेमाटोग्राफर पुरुषोत्तम प्रधानले निरन्तर हौसला दिएको बताइन्।
“पुरुषोत्तम दाइ जसले मलाई कहिल्यै कमजोर हुन दिनुभएन। जतिखेर पनि ‘हामी गर्न सक्छौं म्याम, हामी गरम’ भनेर सँधै साथमा रहनुभयो। थ्याङ्क्यू सो मच दाइ।”
यसैगरी उनले आफ्नो निर्माता भाइलाई आफ्नो उद्देश्यमा सहयोग गर्ने बताउँदै भगवान सरह नै भएको बताइन्।
सालको अन्तिममा रिलिज हुने ‘पिताम्बर’लाई बम्पर व्यापार गर्ने सिनेमाको सूचीमा राखिएको छ।
