‘वसन्त’को अग्रिम टिकट बुकिङ खुला भएको छ।
फिल्मले मल्टीप्लेक्सदेखि सिंगल स्क्रिनसम्मले उच्च शो पाएको छ। फिल्म चैत्र २२ गते रिलिज हुँदैछ ।
देशकै ठूलो मल्टीप्लेक्स चेन क्युएफएक्सले देशभर ७१ शो दिएको जसमा काठमाडौं उपत्यकामा ३३ शो दिएको छ।मोफसलमा इटहरी बाहेकका हलमा वसन्तलाई क्युएफएक्सले ३८ शो दिएको छ ।
यो प्रारम्भिक शो समख्या हो र फिल्म रिलिज हुन दुई दिन बाँकी रहेको हुँदा बुधबार र बिहीबार थप शो पाउने निश्चित छ ।
सिनेमाले सेन्सर बोर्डबाट यूनिभर्सल प्रमाणपत्र पाएको छ ।
अग्रिम टिकट बुकिङको प्रारम्भिक रुझान हेर्दा ट्रेन्ड हेर्दा फिल्म शुक्रबार ४ सय हाराहारी शो प्राप्त गर्ने देखिएको छ।
नेपाल र विदेशमा एकसाथ रिलिज हुने फिल्म ‘वसन्त’मा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे, विशाल पहारीको अभिनय रहेको छ।
गलबन्दी प्रोडक्सनको प्रस्तुति रहने सोसल ड्रामा फिल्ममा कथा, पटकथा र संगीत पनि निर्देशक सपुतले नै तयार पारेका छन्। विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा फिल्मले भन्ने छ। फिल्मको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र बिरेन्द्र नारायण श्रेष्ठ छन्।
गायक तथा निर्देशक सपुतको जन्मथलो बागलुङ, काठमाडौं र तराईका विभिन्न ठाउँमा फिल्मको छायांकन गरिएको हो। गायक तथा अभिनेता प्रकाश सपुतको डेब्यू निर्देशनिय फिल्मलाई सुसन प्रजापतिले खिचेका हुन्। काठमाडौं उपत्यकामा डिसिएन र मोफसलमा एफडी कम्पनिले फिल्मलाई वितरण गर्नेछन्।