‘बिगुल’ फिल्मको गीतमा नेपाली काँग्रेसका महामन्त्री विश्वप्रकाश शर्माले संगीत दिएका छन् ।
उनले फिल्ममा समावेश हुने ‘आऊ यस्तो देश बनाऔं’ बोलको गीतमा संगीत दिएका हुन्। गीतको शव्द पनि शर्माकै हो ।
समसामयिक सामाजिक र राजनीतिक कथावस्तुमा निर्माण हुन लागेको फिल्मलाई रमेश कोइरालाले निर्देशन गर्दैछन्।
बुधबार अनामनगरस्थित सायारेम स्टुडियोमा गीत रेकर्ड गरिएको हो । गीत चर्चित गायक राजेशपायल राईको स्वरमा रेकर्ड भएको छ ।
‘महामन्त्री शर्माले निकै सान्दर्भिक शब्द र मिठासपूर्ण संगीत सृजना गर्नुभएको छ । ‘बिगुल’मा यो गीतको उपस्थिति निकै अर्थपूर्ण छ । कुशल राजनीतिज्ञका साथै गीतसंगीतमा समेत निकै दख्खल राख्ने विश्वप्रकाश दाईको शब्द, संगीतप्रति नतमस्तक छु ’, निर्देशक कोइरालाले भने ।
म्याग्नेलिया गुर्प प्रालिको ब्यानरमा निर्माण हुने फिल्ममा नरेन खड्का, बेनिशा हमाल, रमेश बुढाथोकी, गीता अधिकारी, सुमोद भारद्वाजलगायतको अभिनय रहनेछ।
फिल्मको छायाँकन चितवनमा हुनेछ।
