चैत २९ गते रिलिज हुन लागेको मल्टिस्टारर फिल्म ‘पिताम्बर’को ट्रेलर वर्ल्डवाइड ट्रेन्डिङमा परेको छ। गत मंगलबार एक कार्यक्रमका बीच सार्वजनिक गरिएको ट्रेलर तीन घण्टा नपुग्दै युट्युबको मुभी सेसनमा ९औं स्थानमा ट्रेन्डिङमा आएको थियो। अहिले मुभी सेसनमा तेस्रो स्थानमा रहेको छ।
फिल्मको ट्रेन्डिङ स्थिति अन्तर्राष्ट्रिय स्तरमा पनि फैलिएको छ। हाल ट्रेलर कोरियामा ८औं, मलेसियामा १२औं, अष्ट्रेलियामा १३औं, साउदी अरेबियामा २२औं, जापानमा १०औं, कतारमा १२औं, पोर्चुगलमा १५औं, र युएईमा १०औं स्थानमा ट्रेन्डिङमा पर्न सफल भएको छ।
अहिलेसम्म ट्रेलरलाई ११ लाख ४२ हजारभन्दा बढी भ्यूज प्राप्त भइसकेको छ, र यो संख्या अझै बढ्दैछ। युट्युबमा ट्रेलरप्रति देखिएको आकर्षणले फिल्मले वक्स अफिसमा बलियो सुरुवात गर्ने आधार बनाएको छ।
केपी फिल्मस् र पुरुषोत्तम प्रधान फिल्म्सको ब्यानरमा निर्माण भएको यो फिल्मलाई कृषा चौलागाईंले निर्देशन गरेकी हुन्। फिल्ममा प्रदीप खड्का, दयाहाङ राई, सौगात मल्ल, आर्यन सिग्देल, अनुपविक्रम शाही, सुरक्षा पन्त, गौरी मल्ल, रविन्द्र झा, प्रमोद अग्रहरि, कामेश्वर चौरासिया, टिका पहाडी, सुलभ पहाडी, सुरवीर पण्डित, विशाल पहाडी, दिव्यदेव पन्त, सुपुष्पा भट्ट, दिव्या रायमाझी, गौरव विष्ट, आशिष पुरुष, ललित विष्ट, किशोर भट्ट, विनोदकुमार पौडेल, नारायण काफ्ले र रविन्द्र भट्टराईको अभिनय रहेको छ।
बाल कलाकारको रूपमा आर्नव घिमिरे, प्रयुस दत्त सुवेदी, आध्य लामिछाने, आरोह चौलागाईं र सुप्रोल बुढाथोकी (अनमोल) को पनि अभिनय छ।
विशाल चौलागाईं निर्माता रहेको यस फिल्ममा पुरुषोत्तम प्रधान, आध्य लामिछाने र आरोह चौलागाईं सह-निर्माता छन्। सुमन गौतम कार्यकारी निर्माता हुन्। प्रदीप भारद्वाज र अभिमन्यु निरवीको पटकथा र संवाद, पुरुषोत्तम प्रधानको डीओपी, शेरबहादुर लामा र मानकृष्ण महर्जनको छायांकन, बन्दे प्रसादको सम्पादन र ट्रेलर निर्माण, आशीष अविरल र बाबुल गिरीको संगीत, र हिमाल केसीको द्वन्द्व निर्देशन रहेको छ। फिल्मलाई आरआर फिल्म्सले वितरण गर्दैछ।